Hüseyn Cavidin 140 illiyi Yasamal rayonunda qeyd olundu
Yasamal Rayon İcra Hakimiyyətinin və Azərbaycan Dövlət Pedaqoji Universitetinin nəzdində Azərbaycan Dövlət Pedaqoji Kollecinin birgə təşkilatçılığı ilə Azərbaycanın dahi dramaturqu, filosof-şair Hüseyn Cavidin 140 illiyinə həsr edilmiş “Turana qılıncdan daha kəskin, ulu qüvvət, Yalnız mədəniyyət, mədəniyyət, mədəniyyət...” adlı tamaşa-tədbir keçirildi.
Tədbirdə Yasamal Rayon İcra Hakimiyyətinin başçısı Elşad Həsənov, YAP Yasamal rayon təşkilatının sədri Bəxtiyar Nəbiyev, Azərbaycan Dövlət Mədəniyyət və İncəsənət Universitetinin rektoru Ceyran Mahmudova, Azərbaycan Dövlət Pedaqoji Universitetinin rektoru Cəfər Cəfərov, Azərbaycan Dövlət Pedaqoji Kollecin direktoru İsrayıl İsgəndərov və digər nümayəndələr iştirak etdilər.
Əvvəlcə tədbir iştirakçıları kollecin foyesində Hüseyn Cavidin ev-muzeyinin nümayiş etdirdiyi filmlə tanış oldular, onun həyat və yaradıcılığına həsr olunmuş sərgiyə baxış keçirdilər. Daha sonra tələbələrin ifasında “Turana qılıncdan daha kəskin, ulu qüvvət, Yalnız mədəniyyət, mədəniyyət, mədəniyyət...” adlı tamaşa nümayış olundu.
