Nəsiminin 650 illiyi qeyd olundu

19 dekabr tarixində Heydər Əliyev adına Müasir Təhsil Kompleksində Akademik Zərifə xanım Əliyeva adına liseyin təşkil etdiyi Böyük Azərbaycan şairi İmadəddin Nəsiminin 650 illik yubileyinə həsr olunmuş “Mənəm” adlı tədbir keçirildi.

Tədbirdə Yasamal Rayon İcra Hakimiyyətinin başçısı Elşad Həsənov, Azərbaycanın xalq artistləri Rasim Balayev və Rafiq Əzimov, Azərbaycan Respublikası Təhsil Nazirliyinin və Azərbaycan Respublikası Mədəniyyət Nazirliyinin nümayəndələri, Fəlsəfə İnstitutunun direktoru İlham Məmmədov, Azərbaycan Milli-Elmlər Akademiyasının fəlsəfə elmləri doktoru, professor Mahirə Quliyeva, Yasamal rayonunun tam orta məktəblərinin direktorları, liseyin müəllimləri, şagirdləri və valideynlər iştirak etdilər.

Liseyin direktoru Mehriban Vəliyeva tədbiri açıq elan edərək qonaqları salamladı. Nəsiminin Azərbaycan xalqının ümumbəşər mədəniyyətinə bəxş etdiyi qüdrətli söz ustası olduğunu vurğuladı. Qeyd etdi ki, Nəsimi Şərqin zəngin mədəni-mənəvi sərvətləri üzərində ucalmış və bədii söz sənətinin son dərəcə qiymətli incilərini meydana gətirmişdir. Şair daim dərin poetik fikirlərlə fəlsəfi görüşlərin vəhdətində olub.

Sonra Akademik Zərifə Əliyeva adına liseyin şagirdləri liseyin dram dərnəyinin rəhbəri Bəhruz Vaqifoğlunun “Mənəm” adlı kompozisiyasını təqdim etdilər.

Təqdimatdan sonar çıxış edən Fəlsəfə İnstitutunun direktoru İlham Məmmədov, Azərbaycan Milli-Elmlər Akademiyasının fəlsəfə elmləri doktoru, professor Mahirə Quliyeva öz çıxışlarında “Nəsimi ili”nin ölkəmizdə nəsimişünaslığın inkişafına, böyük mütəfəkkirin irsinin, şairin ideallarının populyarlaşmasına böyük təkan verərək, yeni-yeni kitab, monoqrafiya və sənət əsərlərinin yaranmasının stimullaşdırılmasını söylədilər.

Xalq artistləri Rasim Balayev və Rafiq Əzimov şagirdlərin bu təqdimatını çox bəyəndiklərini vurğuladılar. Rasim Balayev bildirdi ki, Prezident İlham Əliyevin Sərəncamı ilə bu il ölkəmizdə mütəfəkkir-şair İmadəddin Nəsiminin 650 illik yubileyi ilə əlaqədar “Nəsimi ili” elan olunub. Bununla bağlı Azərbaycanda, o cümlədən xaricdə müxtəlif tədbirlər həyata keçirilir, şairin kitabları nəşr olunur, mətbuatda Nəsimi yaradıcılığı geniş təbliğ edilir Yasamal rayon məktəblilərinin də ifasında bir neçə təqdimatda iştirak edən xalq artisti bugünki təqdimatı olduqca zəngin, peşəkar və möhtəşəm adlandırdı.