Yasamal rayon Heydər Əliyev Mərkəzində Azərbaycan Ağsaqqallar Şurasının rayon gəncləri ilə görüşü keçirildi

Yasamal rayon Heydər Əliyev Mərkəzində Azərbaycan xalqının ümummilli lideri Heydər Əliyevin 90 illik yubileyi ilə əlaqədar Azərbaycan Ağsaqqallar Şurasının rayon gəncləri ilə görüşü keçirildi.
Tədbirdə Yasamal rayon İcra Hakimiyyətinin Başçısı, İcra Hakimiyyəti Başçısının müavinləri,  Milli Məclisin deputatı, Azəbaycan Ağsaqqallar Şurasının sədri, Şuranın üzvləri, Yasamal rayon Ağsaqqallar Şurasının sədri, müxtəlif sahələrda uğurlar qazanmış gənclər, universitetlərin Tələbə Gənclər Təşkilatlarının sədr və üzvləri, KİV nümayəndələri və digər qonaqlar iştirak edirdi.
Tədbir iştirakçıları ilk öncə Mərkəzin “Muzey” bölməsi ilə tanış oldular. Qonaqlar  Ulu öndərin  büstü önünə gül dəstələri qoyaraq ümummilli liderin əziz xatirəsini yad etdilər, “Xatirə kitabına” öz ürək sözlərini yazdılar.
Azərbaycan xalqının ümummilli lideri Heydər Əliyevlə işləmiş, onunla bilavasitə ünsiyyətdə olmuş respublikanın ictimai xadimlərinin və tanınmış ağsaqqalların görüşü “Heydər Əliyev İrsi və Salnamə” bölməsində dəyirmi masa arxasında davam etdirildi.
Ön sözlə Yasamal rayon İcra Hakimiyyətinin Başçısı İbrahim Mehdiyev çıxış edərək Ulu öndərin ölkəyə rəhbərlik etdiyi dövrdə həyata keçirdiyi misilsiz xidmətlərdən söz açdı, Azərbaycan Respublikasının qazandığı bügünkü uğurların məhz Heydər Əliyev siyasətinin nəticəsi olduğunu qeyd etdi.
Fəttah Heydərov, Kərim Kərimov, Maqsud Qasımov, İlham Səfərov çıxışları zamanı  Heydər Əliyevin  dövlətçiliyimizin möhkəmləndirilməsi və Azərbaycan xalqının özünə güvəninin, gələcəyə inamının artırılması yönündəki müstəsna xidmətlərindən, Heydər Əliyev şəxsiyyəti, adı və ideyaları ətrafında birləşən Azərbaycan cəmiyyətinin  gücü, qüdrəti və əzəmətindən söz açdılar. Bu gün möhtərəm Prezidentimiz İlham Əliyev tərəfindən   ulu öndərimizin siyasətinin ardıcıllıq, dəqiqliklə davam etdirildiyi və bu siyasətin nəticəsində Azərbaycanın müstəqilliyinin daimi, sarsılmaz olacağı xususilə vurğulandı.