Aprel şəhidi: Azərbaycanın Milli Qəhrəmanı Murad Mirzəyevin doğum günüdür

Bu gün aprel döyüşlərində qəhrəmancasına şəhid olan Xüsusi Təyinatlı Qüvvələrin polkovnik-leytenantı, Azərbaycanın Milli Qəhrəmanı Murad Mirzəyevin doğum günüdür.

Murad Mirzəyev 1976-cı ildə Sabirabad rayonunun Muğan Gəncəli kəndində anadan olub. 1998-ci ildə Türkiyədə Ali Hərbi Məktəbi bitirib, ABŞ, Ruminya, İordaniya kimi ölkələrdə təlimlər keçib.

Murad Mirzəyev 2016-cı ildə aprel döyüşlərində şəhid olub. Şəhid zabitin nəşi aprelin 10-da Beynəlxalq Qırmızı Xaçın vasitəçiliyi ilə döyüş meydanından götürülərək Azərbaycana təhvil verilib. Murad Mirzəyev aprelin 11-də II Fəxri Xiyabanda dəfn olunub.  Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyevin 2016-cı il 19 aprel tarixli sərəncamı ilə ölkəmizin ərazi bütövlüyünün qorunub saxlanılmasında xüsusi xidmətlərinə və döyüş tapşırığını yerinə yetirərkən göstərdiyi şəxsi igidliyə görə polkovnik-leytenant Mirzəyev Murad Telman oğluna ölümündən sonra "Azərbaycanın Milli Qəhrəmanı" adı verilib.

Onun doğum günündə ailəsi, valideynləri, Yasamal rayon İcra Hakimiyyətinin başçısı Əziz Əzizov, Milli Məclisin deputatı Elşad Həsənov, rayonun idarə və müəssisə rəhbərləri, rayon ictimaiyyəti və gəncləri, döyüş dostları, yaxınları və doğmaları II Fəxri Xiyabana toplaşdılar. Murad Mirzəyevlə yanında dəfn olunan  aprel şəhidi, baş leytenant Mirzə Novruzovun məzarıdır. Əvvəlcə şəhidlərin ruhu bir dəqiqəlik sükutla anıldı, sonra məzarları önünə əklillər və gül dəstələri düzüldü. Çıxış edənlər  qəhrəmanları yad edərək aprel döyüşlərinin bizim şanlı hərbi qələbəmiz, dövlətimizin, xalqımızın, ordumuzun gücünü göstərən qələbə olduğunu vurğuladılar. Aprel döyüşləri nəticəsində Füzuli, Cəbrayıl və Ağdərə rayonlarının işğaldan azad edilmiş ərazilərində bu gün Azərbaycan bayrağı dalğalanır. Aprel döyüşləri göstərdi ki, Azərbaycan xalqı və dövləti heç vaxt işğalla barışmayacaq, öz ərazi bütövlüyünü nəyin bahasına olursa-olsun, bərpa edəcəkdir. Bu gün Azərbaycan Ordusu təmas xəttində tam üstünlüyü özündə saxlayır.

Aprel döyüşləri, demək olar ki, erməni daşnaklarının ideoloji əsaslarını dağıtdı. Aprel döyüşlərində hərbçilərimiz qəhrəmanlıq göstərdilər. Dörd günlük ağır döyüşlərdə Xüsusi Təyinatlı Qüvvələrin polkovnik-leytenantı, qəlbi Vətən, Azərbaycan eşqi ilə döyünən Murad Telman oğlu Mirzəyev və baş leytenant Mirzə Sərvər oğlu Novruzov şəhidlik zirvəsinə yüksəldilər, adları Azərbaycanın müharibə tarixinə qızıl hərflərlə yazıldı.

Allah rəhmət eləsin.