''Sovetski'' ərazisindəki azkvadratlı mənzil sakinləri Ramazan bayramını yeni mənzillərində keçirəcəklər
13 iyun 2016-cı il tarixdə Koroğlu Rəhimov 9 ünvanında 9 mərətəbəli bir blokdan ibarət olan, 1 otaqlı, 120 mənzilli tam təmir olunmuş növbəti bina sakinlərin istifadəsinə verildi. Tədbirdə çıxış edən Yasamal rayon İcra Hakimiyyəti başçısının I müavini, köçürmə üzrə işçi komissiyasının sədri Səməd İslamov bildirib ki, yaşayış üçün yararsız azkvadratlı mənzillərdə yaşayan sakinlərin istəkləri bu dəfə də nəticəsiz qalmayıb. Ölkə başçısının diqqəti nəticəsində ötən ildəki kimi, bu il də köhnə mənzillər yeniləri ilə əvəz olunur. Yeni mənzillərin verilməsi bu məqsədlə yaradılmış Komissiyanın apardığı araşdırmaların nəticələrinə uyğun olaraq, digər yaşayış sahələri olmayan, daha çətin mənzil şəraiti olan sakinlərə şamil edilib. Səməd İslamov çıxışının sonunda yeni mənzil sahiblərinə can sağlığı və xöşbəxt ömür arzuladı.
Sonra Nərimanov rayon İcra Hakimiyyəti başçısının I müavini Şahmar İbadov mənzillərin yüksək keyfiyyətlə təmir olunduğunu vətəndaşların diqqətinə çatdırıb və bundan sonra Nərimanov rayon sakinləri olacaq bütün yeni mənzil sahiblərinin sənədlərinin vaxtında veriləcəyini vurğulayaraq bu gözəl gün münasibətilə onları bir daha təbrik etdi.
Tədbirin rəsmi hissəsindən sonra yeni mənzil alan sakinlərə evlərinin açarları paylanıldı.
Yeni mənzil sahibləri isə bu günün həyatlarına unudulmaz bayram günü kimi yazıldığını vurğulayaraq , sevinc hisslərini onlara yaşadan ölkə başçısına dərin minnətdarlıqlarını bildirdilər.
