Azərbaycan xalqının Ümummilli Lideri Heydər Əliyevin anadan olmasının 91-ci ildönümünə həsr olunmuş “Heydər Əliyev: dövlət gənclər və idman siyasəti" mövzusunda konfrans keçirilmişdir
Yasamal rayon İcra Hakimiyyəti və rayon Gənclər və İdman İdarəsinin təşkilatçılığı ilə Azərbaycan Memarlıq və İnşaat Universitetində Azərbaycan xalqının Ümummilli Lideri Heydər Əliyevin anadan olmasının 91-ci ildönümünə həsr olunmuş “Heydər Əliyev: dövlət gənclər və idman siyasəti” mövzusunda konfrans keçirilmişdir.
Konfransı Yasamal rayon Gənclər və İdman İdarəsinin rəisi İlham Səfərov açaraq, tədbir iştirakçılarını salamlamış və konfransın işinə uğurlar arzulamışdır. Daha sonra İ.Səfərov “Heydər Əliyev müstəqil Azərbaycan qurucusudur” mövzusunda məruzə etmiş, Ulu Öndərin dövlət quruculuğu sahəsində yorulmaz fəaliyyətindən, Azərbaycan dövlətçiliyinin yenidən bərpası istiqamətində apardığı titanik fəaliyyət haqqında tədbir iştirakçılarına geniş məlumat vermişdir.
Bakı şəhər Gənclər və İdman Baş İdarəsinin rəisi Raqif Abbasov Ümummilli Liderin gənclərə olan qayğısından danışmış, məhz Heydər Əliyevin təşəbbüsü ilə Azərbaycan Respublikasının Gənclər və İdman Nazirliyinin yaradıldığı, Azərbaycan Gənclərinin I Forumunun keçirildiyi, 01 fevral 1997 – ci il tarixdə imzaladığı tarixi sərəncamına müvafiq olaraq, 02 fevral “Azərbaycan Gəncləri günü”nün təsis edildiyi və bir sıra mühüm qanunvericilik aktlarının qəbul edildiyi bir daha vurğulandı.
Konfransda Azərbaycan Respublikası Gənclər və İdman Nazirliyi yanında Gənclərlə iş üzrə İctimai Şuranın sədri Nurəddin Mehdiyev “Müstəqillik dövründə gənclər təşkilatlarının formalaşması”, Azərbaycan Memarlıq və İnşaat Universitetinin Tələbə Həmkarlar İttifaqı Komitəsinin sədri Bayram Aslanov “Heydər Əliyev və təhsil”, Yasamal rayon Ağsaqqallar Şurasının sədri Kərim Kərimov “Heydər Əliyev haqqında xatirələr” mövzusunda çıxışlar etmişlər.
Konfransın sonunda “Heydər Əliyev müstəqil Azərbaycanın qurucusudur” mövzusunda gənclər arasında keçirilmiş inşa yazı müsabiqəsinin qalibi Leyla Əsədullayeva, habelə idmanda, təhsildə əldə etdikləri yüksək nailiyyətlərə və rayonun ictimai həyatında göstərdiyi səmərəli fəaliyyətinə görə fərqlənmiş bir qrup gənc fəxri fərmanlarla təltif edilmişlər.
