Hüseyn Cavidin anadan olmasının 131-ci ildönümü qeyd edilmişdir

Yasamal rayon İcra Hakimiyyətinin təşkilatçılığı ilə Hüseyn Cavid prospektində dahi Azərbaycan şairi və dramaturqunun adını daşıyan parkdakı möhtəşəm abidəsi önündə anadan olmasının 131-ci ildönümü münasibəti ilə anım mərasimi keçirildi.

Tədbir dahi şair və dramaturq Hüseyn Cavidin abidəsi önünə əklillər və təzə-tər çiçəklərin qoyulması ilə başlanıldı.

Tədbirdə yasamal rayon İcra Hakimiyyətinin Başçısı İbrahim Mehdiyev, Yeni Azərbaycan Partiyası Yasamal rayon təşkilatının sədri Fikrət İsmayılov, Bakı Metropoliteninin rəisi Tağı Əhmədov, Azərbaycan Respublikası Milli Elmlər Akademiyasının müxbir üzvü, Nizami adına Ədəbiyyat institutunun direktor müavini Teymur Kərimli, Yasamal rayon İcra Hakimiyyəti Başçısı aparatının əməkdaşları, rayon bələdiyyəsinin üzvləri və əməkdaşları, təhsil, səhiyyə və mədəniyyət işçiləri, ictimai təşkilatların təmsilçiləri, tanınmış mədəniyyət və incəsənət xadimləri, tələbə və şagirdlər, ictimaiyyət və kütləvi informasiya vasitələrinin nümayəndələri iştirak etdilər.

Yasamal rayon İcra Hakimiyyətinin Başçısı İbrahim Mehdiyev giriş nitqi ilə çıxış edərək anım mərasimini açıq elan etdi və sözü tədbirin aparıcısı Teymur Kərimliyə verdi. Teymur Kərimlinin çıxışından sonra Cavidsevər Tağı Əhmədov, filologiya elmləri doktoru, cavidşünas alim Kamran Əliyev, Hüseyn Cavidin ev muzeyinin direktoru Gülbəniz Babaxanlı və digərləri böyük mütəfəkkirin keşməkeşli həyat və yaradıcılığından tarixi faktlarla ətraflı söhbət açdılar.

Anım mərasimində Azərbaycanın tanınmış incəsənət xadimlərinin, o cümlədən Azərbaycan Respublikasının xalq artisti Mələkxanım Eyyubovanın ifasında  Hüseyn Cavidin əsərlərindən və ona həsr edilmiş şerlərdən ibarət parçalar səsləndirildi.