Şriftin ölçüsü :

Saytın rəngi :

Mikayıl Müşfiqin anım günü qeyd edildi

06 yanvar 2018 | 11:00

Azərbaycan ədəbiyyatının unudulmaz siması Mikayıl Müşfiqin vəfatından 80 il ötür. Yasamal rayon İcra Hakimiyyəti və “Cabir Novruz” Mədəniyyət fondunun birgə təşkilatçılığı ilə tədbir təşkil olundu.Ölməz şairin xatirə günündə poeziyasevərlər ənənəyə sadiq qalaraq onun Yasamal rayonundakı abidəsi önünə toplaşıb gül dəstələri qoydular. Ömrünün və yaradıcılığının çiçəkləndiyi bir vaxtda 29 yaşında əqidəsi uğrunda ölümə tuş gələn Mikayıl Müşfiq poeziyasevərlərin qəlbində əbədi taxt qurmağı bacardı. Vəfatından 80 il ötsə də ildə iki dəfə Müşfiqsevərlər ustadın abidəsi qarşısına toplaşaraq onun doğum və anım günlərini qeyd edirlər.

Yasamal rayonu ərazisində İnşaatçılar və Nərimanov prospektlərinin kəsişməsində aparılan yenidənqurma və yol təmir-tikinti işləri ilə bağlı görkəmli şair Mikayıl Müşfiqin abidəsinin yerləşdiyi parkda da yenidənqurma işləri həyata keçirilib. Azərbaycan Respublikasının Prezidenti Cənab İlham Əliyevin tapşırığına əsasən abidə öz yerinə bərpa olunub, şairin heykəlinin ucaldıldığı park da aparılan abadlıq işlərindən sonra yenidən insanların istifadəsinə verilib. Ötən ilin avqust ayında Prezident İlham Əliyev yenidən qurulan “Statistika” dairəsində görülən işlərlə tanış olarkən Azərbaycan ədəbiyyatının görkəmli simalarından olan Mikayıl Müşfiqin abidəsini ziyarət edib, önünə gül dəstəsi qoyub.

Yasamal Rayon İcra Hakimiyyəti başçısının müavini Təravət Muradova  çıxış edərək bildirdi ki, Azərbaycan xalqı həmişə ədəbiyyata, sözə böyük dəyər verib. Mikayıl Müşfiq də ölkəmizdə sevilən şairlərdən biridir. “Mikayıl Müşfiq adı Azərbaycan ədəbiyyatına həkk olunmuş böyük şəxsiyyətlərdən biridir. Yaradıcılığının çiçəklənən dövründə repressiyaya məruz qalan Mikayıl Müşfiq çox qısa ömür yaşadı. Amma buna baxmayaraq onun əsərləri həmişə dillər əzbəri olub. Onun “Yenə o bağ olaydı”, “Oxu, tar” və bir sıra başqa əsərləri Azərbaycan poeziya xəzinəsinin inciləri sırasındadır”.

Azərbaycan Qırmızı Aypara Cəmiyyətinin vitse-prezidenti Qafar Əsgərzadə, “Cabir Novruz” Mədəniyyət fondu rəhbərinin müavini Müşfiq Cabir oğlu,şair Oqtay Rza, Mikayıl Müşfiq adına 18 saylı tam orta məktəbin müəllimləri, şagirdləri və ictimaiyyət nümayəndələri poeziya ustasının yaradıcılığından söz açdılar, bu gün hər bir azərbaycanlının qəlbində onun əziz xatirəsinin dönə-dönə yaşayacağını qeyd etdilər.

Tədbir təşkilatçıları vurğuladılar ki, hazırda Xızı rayonunda şairin adını daşıyan muzey fəaliyyət göstərir. Muzey Xızı sakinləri və rayona gələn qonaqların diqqət mərkəzindədir. Mikayıl Müşfiqin xatirəsi hər zaman əziz tutulur.

Sonra Müşfiqsevərlər Xızı şəhərinə,onun doğma ocağına yola düşdülər.

Keçidlər