Yasamal rayonunda səhiyyə işçilərinin peşə bayramı qeyd olundu
Yasamal Rayon İcra Hakimiyyəti və Yeni Azərbaycan Partiyası Yasamal rayon təşkilatının birgə təşəbbüsü ilə Akademik M.Topçubaşov adına Elmi-Cərrahiyyə Mərkəzində “17 İyun -Tibb işçilərinin peşə bayramı günü” qeyd olundu. Tədbirdə Yasamal Rayon İcra Hakimiyyətinin başçısı Elşad Həsənov, YAP Yasamal rayon təşkilatının sədri Bəxtiyar Nəbiyev, Akademik M.Topçubaşov adına Elmi-Cərrahiyyə Mərkəzinin direktoru Rauf Ağayev, rayonun səhiyyə müəssisələrinin rəhbərləri və rayon ictimaiyyəti iştirak etdilər. Tədbirdən öncə Akademik M.Topçubaşov adına Elmi Cərrahiyyə Mərkəzində Ümummilli Lider Heydər Əliyevin büstü ziyarət olunub, önünə əklil qoyulub, Ulu Öndərin əziz xatirəsi dərin ehtiramla anılıb. Dövlət Himni səsləndikdən sonra Ulu Öndər Heydər Əliyevin və torpaqlarımızın suverenliyi və azadlığı uğrunda canlarını qurban vermiş şəhidlərimizin əziz xatirəsi bir dəqiqəlik sükutla yad edilib. Daha sonra 17 İyun -Tibb işçilərinin peşə bayramı gününə həsr olunmuş videoçarx nümayiş olunub.
Tədbiri giriş sözü ilə açan Yeni Azərbaycan Partiyası Yasamal Rayon təşkilatının sədri Bəxtiyar Nəbiyev qeyd edib ki, Ümummilli Lider Heydər Əliyevin ölkəyə rəhbərlik etdiyi dövrdə islahatlar tibb sahəsində də öz bəhrəsini verdi. Bu gün Azərbaycan səhiyyəsi özünün yeni inkişaf mərhələsini yaşayır. Prezident cənab İlham Əliyevin diqqət və qayğısı ilə müasir tibb mərkəzləri açılır, köhnə tibb ocaqları yenidən bərpa olunaraq müasir avadanlıqlarla təchiz olunur.
Yasamal Rayon İcra Hakimiyyətinın başçısı Elşad Həsənov öz çıxışında vurğuladı ki, Ulu Öndər Heydər Əliyevin 2001-ci il tarixli fərmanı ilə hər il iyunun 17-də Azərbaycan Respublikasında tibb işçilərinin peşə bayramı günü kimi qeyd olunur. Bu günü peşə bayramı günü kimi qeyd etməyi tibb işçilərinə təqdim edən edən Ulu Öndərimiz Heydər Əliyevin səhiyyə sistemində fədakarcasına çalışan tibb personalına, həkimlərə, ziyalı alimlərə göstərdiyi diqqətin, qayğının təzahürü idi. Ümummilli Liderin ölkə rəhbərliyinə qayıdışından dərhal sonra onun həyata keçirməyə başladığı islahatlar səhiyyənin səmərəsinin yüksəldilməsi və intensivləşdirilməsi üçün baza yaratmış, beynəlxalq əlaqələr genişləndirilmişdir. Ölkəmizdə səhiyyə sisteminin inkişafı, bu sahənin maddi-texniki bazasının, kadr potensialının gücləndirilməsi və infrastrukturun yeniləşdirilməsi daim diqqət mərkəzindədir.
Akademik M.Topçubaşov adına Elmi Cərrahiyyə Mərkəzinin direktoru Rauf Ağayev, Akademik M.Topçubaşov adına Elmi Cərrahiyyə Mərkəzinin şöbə rəhbəri Fazil Abbasov və şöbə müdiri Nərgiz Məmmədova öz çıxışlarında ölkəmizin səhiyyə sahəsində əldə etdiyi uğurlardan və bu uğurların əldə olunmasında Ümummilli lider Heydər Əliyevin, cənab Prezident İlham Əliyevin və Birinci vitse-prezident Mehriban xanım Əliyevanın müstəsna fəaliyyətlərindən bəhs etdilər. Çıxışlardan sonra Yasamal rayonunun ictimai-siyasi həyatında fərqlənən bir qrup səhiyyə işçisi Yasamal Rayon İcra Hakimiyyətinin və YAP Yasamal rayon təşkilatının fəxri fərmanları ilə təltif olundular.
